Votat nga Partia Demokratike e Kosovës dhe Aleanca për Ardhmërinë e Kosovës për Dimal Bashën, kryetar të Kuvendit, sipas Ahmet Isufit kanë qenë gabim.
Anëtari i kryesisë së AAK-së, ka thënë se votimi ndërmjet dy kandidatëve Albulena Haxhiut dhe Dimal Bashës nuk është i pëlqyer as për qytetarët.
Ai në emisionin “Ditari” në Tëvë1 ka thënë se mënyra e sjelljes dhe propozimet nga Vetëvendosje kanë qenë të qëllimshme.
“Konsideroj se kanë gabuar, për arsye se zgjedhja në mes Albulena Haxhiut dhe Dimal Bashës nuk është një zgjedhje e pëlqyer për qytetarët, përkundrazi është edhe me degraduese. Por në total kjo mënyrë e sjelljes dhe propozimit të kandidatëve ka qenë e qëllimshme, që edhe mos të votohen, të prolongohet zgjedhja e kryesisë dhe të mbetët kjo situatë”, ka thënë ai.
Dimal Basha, është zgjedhur kryetar i Kuvendit të Kosovës më 26 gusht, duke marrë 73 vota.
Ai u votua edhe nga PDK e AAK.
Në të njëjtën ditë janë votuar edhe tre nënkryetarët e Kuvendit nga grupet më të mëdha parlamentare të parive shqiptare dhe ai nga komuniteti joserb.
Por, ka dështuar zgjedhja e nënkryetarit nga komuniteti serb.
Pavarësisht, mosvotimit të nënkryetarit nga komuniteti serb, kryetari i Kuvendit Dimal Basha, ka thënë se kuvendi është i konstituuar, pasi sipas tij pika e katërt e seancës konstituive është ezauruar.
Për nënkryetar të Kuvendit nga komuniteti serb nuk kanë marrë votat e mjaftueshme asnjë nga deputetët e Listës Serbe, por as i vetpropozuari Nenad Rashiq.
