Nënkryetari i Aleancës për Ardhmërinë e Kosovës, Ahmet Isufi, pret që në shtator të ketë lëvizje pozitive sa i përket iniciativës së kësaj partie për rrëzimin e Qeverisë Kurti, përmes një mocioni të mosbesimit.
Ai ka thënë se puna e Kuvendit dhe mënyra se si është përfunduar seanca e fundit e sesionit pranveror tregon për mos funksionimin e këtij legjislacioni dhe mundësinë që në shtator puna e Kuvendit të nisë ndryshe.
“Jam i bindur që do të ketë lëvizje më aktive dhe një energji më e madhe do të mobilizohet për të kundërshtuar këtë Qeveri. Ndërprerja e seancës tregon për mos funksionimin e këtij Kuvendi. Mbyllja në anë mënyrë e seancës së fundit tregon mundësin e fillimit ndryshe të punës së Kuvendit në sezonin vjeshtor. Besojmë se do të ketë reagime shumë më të mëdha, sepse janë marrë obligime nga kjo Qeveri për zbatimin e marrëveshjes së Ohrit, mundësia e zgjedhjeve të reja në veri”, ka thënë Isufi në emisionin “Ditari” në Tëvë1.
Ai ka thënë se rrëzimi i kësaj Qeverie është i nevojshëm dhe ka shprehur besimin që do të përkrahet edhe nga PDK e LDK, por edhe nga deputetë të shumicës.
Sipas tij, kjo Qeveri nuk është e interesuar të përfundojë dialogun dhe marrëveshjen finale me Serbinë.
