Në Bruksel po mbahet takimi i radhës në mes kryeministrit të Kosovës, Albin Kurti dhe presidentit të Serbisë, Aleksandar Vuçiq. E nga ky takim, Drejtori Ekzekutiv i Forumit Ballkanik, Astrit Istrefi nuk pret ndonjë ndryshim rrënjësor.
Mirëpo, Istrefi më shqetësuese e sheh faktin që kryeministri Kurti, ka deklaruar që nuk ka fare ide se çka përmban drafti i Asociacionit, i cili do të prezantohet sot gjatë takimit.
“Çfarë do mesazhi që vjen nga atje, është progres, është mesazh pozitiv. Do të ishte e pakuptimtë të pritej më shumë se sa kaq. Prandaj, nuk pres ndonjë ndryshim rrënjësor, do të ketë takime të tilla edhe në të ardhmen, progresi do të jetë i ngadalshëm. Pritjet nuk kanë qenë të mëdha as në fillim, nuk janë të mëdha as sot. Kemi edhe një paradoks në takimin e sotëm, derisa kryeministri, Albin Kurti, deklaron që nuk ka ide se çka përmban drafti i statutit të Asociacionit, i bie që Kurti nuk po e ushtron detyrën e tij dhe nuk po e ushtron përgjegjësinë e tij që e ka ndaj Kushtetutës. Kurti është dashur ta dijë përmbajtjen e draftit të Asociacionit para se të shkojë në takim. Nuk mund ta pranojmë si të natyrshme që kryeministri i Kosovës, Albin Kurti, për vendin të cilin e udhëheq, nuk ka ide as kush është në ekipin menaxhues dhe as çfarë drafti do të prezantohet sot në takim”, deklaroi Istrefi në emisionin “Ditari” në Tëvë1.
I pyetur se a ka mundësi që Kurti ka shkuar sot në takim me një draft të shkruar edhe pse nuk iu është kërkuar, Istrefi deklaroi se një gjë e tillë nuk përjashtohet si mundësi, përcjell teve1.info.
Sipas Istrefit, kryeministri Kurti nuk e ka fare problem edhe në qoftë se nuk do të ketë progres në dialog me Serbinë.
“Serbisë nuk i intereson të arrijë marrëveshje me Kosovën. Duket që edhe për kryeministrin Kurti nuk është shqetësuese në qoftë se nuk ka progres në dialog. Për Kurtin, dialogu s’do duhej të ndodhte fare. Prandaj, në 2-3 vitet e ardhshme pritet që marrëveshjet për të cilat janë pajtuar palët, të mos zbatohen plotësisht ose mund të riciklohen përsëri”, shtoi tutje Istrefi.
Në takimin e sotëm në Bruksel mes Kurtit e Vuçiqit, pritet të prezantohet draft-statuti i Asociacionit si hap i parë i rëndësishëm, sipas të dërguarit të BE, Miroslav Lajçak. /teve1.info/.