Kandidati për kryetar të Prishtinës nga radhët e PDK-së, Uran Ismaili, ka premtuar ndryshim në menaxhimin e mbeturinave në kryeqytet.
Ai ka kritikuar gjendjen aktuale të menaxhimit të mbeturinave, ku thotë se Komuna e ka lënë ndërmarrjen “Pastrimi” vetëm me 16 kamionë për gjithë qytetin, duke e cilësuar këtë si të pamjaftueshme.
“Mënyra se si rregullohet kjo punë, është kur nuk janë vetëm 16 kamionë ashtu siç janë sot. Pra, Komuna e Prishtinës e ka lënë “Pastrimin” me vetëm 16 kamionë për tërë Prishtinën me i mbledh mbeturinat gjë që është e pamundur. Në qoftë se ti je pak menaxher ti e kupton që një e tillë nuk bëhet dhe unë kam dalë me intervenime direkte. Do të sjell 60 kamionë të rinj dhe 2100 kontejnerë të rinj. Këto dy intervenime janë të mjaftueshme në start për me ndryshua krejt gjendjen e mbeturinave në Prishtinë. Prej Kolovices deri te Hajvalia nuk do të ketë asnjë problem me mbeturina në asnjë lagje, qoftë në qendër të qytetit, të gjitha do të largohen”, deklaroi ai në “Këndin e Debatit” në Tëvë1.
Ai shtoi se zgjidhjet e premtuara do të realizohen menjëherë dhe se qytetarët nga Kolovica deri në Hajvali nuk do të kenë më probleme me mbeturinat.
“Qëllimi ynë është që problemet t’i largojmë menjëherë”, tha ai./teve1.info/
