Nënkryetari i PDK-së, Uran Ismaili tha se kandidati për kryeministër i kësaj partie, Bedri Hamza është i gatshëm të formojë qeverinë e ardhshme, nëse partia e parë Lëvizja Vetëvendosje dështon ta bëjë një gjë të tillë.
Ismaili ka thënë se opsionet janë me partitë opozitare.
“Fushata jonë ka qenë fushatë që ka tentuar t i përafrojë qytetarët në bazë të një programi dhe vizioni për zhvillim të vendit. Ideja e vijave të kuqe nuk domethënë gjithnjë në kuptimi e koalicionit. Si opozitë kemi thënë sa i përket formimit të Qeverisë, i takon partisë që ka dalë e para që ta ketë aftësinë, bashkëpunimin dhe komunikimin për ta formuar Qeverinë. Nuk jemi në atë fazë, nuk kemi vënë kushte. Opsionet janë me partitë opozitare. Ne e kemi një pozicion jashtëzakonisht të qartë, por edhe një besim të madh që e kemi një kandidat që arrin ta formojë një shumicë nëse kemi një paaftësi të partisë se parë që ta formojë qeverinë”, ka thënë ai.
Ai shtoi se me 15 prill duhet të japim kontributin që të fillojë konstituimi i Kuvendit dhe pastaj të fillojmë me hapat tjerë që janë procedural ligjor e kushtetues.
I pyetur nga gazetarët për postin e kryetarit të Kuvendit, Ismaili tha se ky post i takon partisë së parë që të krijojë kushtet për votimin e kryetarit të Kuvendit dhe për votimet tjera.
