Deputeti i PDK-së, Uran Ismaili, ka bërë të ditur se Grupi Parlamentar i Partisë Demokratike të Kosovës i ka dërguar letër kryesuesit të seancës konstituive, Avni Dehari, me kërkesë që seanca të vazhdojë nesër, më 16 gusht.
Ismaili tha se PDK-ja kërkon që të thirret seanca, të propozohet kryetari i Kuvendit dhe të bëhet konstituimi i Kuvendit të Republikës së Kosovës.
“Ta rikthejmë rendin kushtetues në Kosovë. Ta thërrasim seancën, ta propozojmë kryetarin e Kuvendit dhe ta konstituojmë Kuvendin e Republikës së Kosovës”, tha Ismaili.
Ai kritikoi edhe Albin Kurtin, duke thënë se Kosova nuk mund të mbetet peng i tij pafundësisht.
“Sot dua t’ju njoftoj se grupi parlamentar i Partisë Demokratike të Kosovës i ka dërguar sërish kërkesë kryesuesit të seancës konstituive, z. Avni Dehari, që të thërrasë vazhdimin e seancës konstituive për nesër më 16 gusht. Ta rikthejmë rendin kushtetues në Kosovë. Ta thërrasim seancën, ta propozojmë kryetarin e Kuvendit dhe ta konstituojmë Kuvendin e Republikës së Kosovës. Nuk mund të bëhet asnjë hap përpara duke ecur jashtë Kushtetutës. Por në njëjtën kohë, Kosova nuk mundet të mbetet peng i Albin Kurtit pafundësisht. Nuk do të pranojmë; nuk do ta normalizojmë një sjellje të tillë. Dhe nuk do ta lejojmë. Prandaj, z. Kurti, eja në Kuvend. Thirrne seancën. Mos ik. Mos u fsheh pas Avni Deharit. Konstituoje Kuvendin. Respektoje Kushtetutën”, tha Ismaili./teve1.info/
