Kandidati i Partisë Demokratike të Kosovës (PDK) për kryetar të Prishtinës, Uran Ismaili, ka reaguar lidhur me rezultatin e zgjedhjeve lokale të vitit 2025, ku doli i treti. Në një video të publikuar për mbështetësit e tij, Ismaili ka falënderuar të gjithë bashkëpunëtorët dhe vullnetarët, duke pranuar se është i zhgënjyer me rezultatin, por gjithashtu i motivuar nga puna dhe mbështetja e ekipit të tij.
“Të dashur mbështetës, aktivistë, vullnetarë dhe miq. Po e bëj këtë video për t’ju falënderuar të gjithëve prej zemre për dashurinë, besimin, mbështetjen dhe angazhimin tuaj gjatë kësaj fushate. Ju keni qenë frymëzimi im më i madh. Ju faleminderit për gjithçka dhe për ndihmën që kemi ndërtuar një fushatë ndryshe,” ka deklaruar Ismaili në videon e tij.
Ismaili ka theksuar se, edhe pse rezultati nuk ishte ai që ai priste, ai ndjehet i motivuar nga mbështetja e vazhdueshme e ekipit të tij dhe besimi që kanë në projektet dhe vizionin e tij për Prishtinën.
“Nuk është e lehtë të pranosh një rezultat të tillë, por gjithsesi jemi krenarë për gjithçka që arritëm gjatë kësaj periudhe. Puna e ekipit ka qenë e jashtëzakonshme, dhe kjo është një motivim për të vazhduar të punojmë për qytetin tonë,” ka shtuar ai.
