Deputeti i Partisë Demokratike të Kosovës, Uran Ismaili, ka kritikuar kryeministrin Albin Kurti për deklarimin e kursimeve të tij në vlerë prej 16.41€, duke e cilësuar si një formë manipulimi të perceptimit të varfërisë.
Nga foltorja e Kuvendit, Ismaili tha se kryeministri jeton pa shqetësime ekonomike dhe shifra e publikuar është një mënyrë për të treguar se po përballet me vështirësi, edhe pse nuk është rasti.
“Po dua të flas për një shifër që nuk më ka lënë rehat disa ditë. Si është e mundur që një shifër kaq e vogël të flet kaq shumë. 16 euro e 41 centë ka një arrogancë, dhe pikërisht kjo më bëri të flasë sot,” tha Ismaili.
Ai shtoi: “16.41€ nuk është shifër që gjeneron pasiguri apo keqardhje, por është hile e një njeriu që jeton pa kokëçarje financiare dhe që shtiret se po ia del me vështirësi. Është një manipulim i varfërisë nga dikush që nuk jeton në varfëri.”
