Njohësi i çështjeve të sigurisë, Avni Islami, ka thënë se Serbia është duke ndërhyrë drejtpërdrejtë në zgjedhjet e 9 shkurtit në Kosovë.
Ai ka thënë se drejtori i Zyrës për Kosovë në Qeverinë e Serbisë, Petar Petkoviq është duke u bërë presion serbëve të Kosovës që të mos mbështesin askënd tjetër përpos Listës Serbe.
Ai tutje tha se Petkoviq po përdor sërish frikën si armën kryesore për të detyruar serbët e Kosovës të mbështesin Listën Serbe.
Statusi i tij i plotë:
Serbia ndërhyn drejtpërdrejt në zgjedhjet e Kosovës!
– Petkoviq u bën presion serbëve të Kosovës që të mos mbështesin askënd tjetër përpos Listës Serbe.
Petar Petkoviq po përdor sërish frikën si armën kryesore për të detyruar serbët e Kosovës të mbështesin Listën Serbe – një degë e Beogradit që nuk punon për interesat e popullit serb, por për strukturat mafioze dhe agjendën politike të Aleksandar Vuçiqit.
– Në deklaratën e tij më të fundit e dhënë për TV serb, pro-regjimit ‘Informer’, Petkoviq pretendon se vetëm Lista Serbe mund të “mbrojë” serbët ,nëse ndonjë mandat nuk i takon atyre “në Kosovë nuk do te ketë me serb”. Këto fjalë nuk janë asgjë tjetër, veçse manipulim dhe përpjekje për të frikësuar serbët, të cilët prej vitesh vuajnë represion nga Serbia.
Lista Serbe – Mjet i kontrollit të Beogradit
– Lista Serbe prej kohësh nuk është një opsion politik që mbron interesat e serbëve në Kosovë. Përkundrazi, ajo funksionon sipas urdhërave të Beogradit dhe klaneve kriminale, me Milan Radoiçiqin në krye, një person i lidhur drejtpërdrejt me krimin, kontrabandën dhe sulmin terrorist në Banjska.
– Petkoviq dhe Lista Serbe duan të monopolizojnë hapësirën politike dhe të ndalojnë çdo alternativë tjetër, sepse çdo përfaqësues politik që nuk është nën kontrollin e tyre mund të mbrojë të drejtat e serbëve, pa u shërbyer interesave të Vuçiqit dhe strukturave të tij kriminale.
– Është ironike që Lista Serbe akuzon Kurtin për spastrimin etnik të Kosovës, ndërsa vetë është e përfshirë në frikësimin e serbëve që nuk duan të ndjekin verbërisht regjimin e Vuçiqit. Çdo serb që guxon të kundërshtojë Listën Serbe etiketohet si tradhtar, dhe shumë janë përballur me kërcënime, presion dhe madje sulme fizike.
– Për vite me radhë, Lista Serbe ka marrë pjesë në proceset politike në Kosovë, por nuk ka sjellë asnjë përfitim për popullin serb.
