Në ditët e para të muajit korrik, mesfushori Drilon Islami kaloi te Cluji rumun nga skuadra e Prishtinës si lojtar i lirë.
Mesfushorit i përfundoi kontrata me Prishtinën dhe kalimi te Cluji u vlerësua hap i madh për karrierën e tij.
Por 25-vjeçari nuk ka debutuar ende për skuadrën rumune dhe mund të largohet ende pa debutuar, shkruan “fanatik.ro”.
Islami nuk bën pjesë në planet e trajnerit Dan Petrescu, ndonëse ai e transferoi pas paraqitjeve të mira me Prishtinën.
Sipas mediumit rumun, ish-kapiteni i Prishtinës pritet të përfundojë te Ballkani i Suharekës.
Cluji e Ballkani kanë bashkëpunuar shumë në vitet e fundit, ku disa lojtarë kaluan nga Ballkani te Cluji, ndërsa Islami pritet të lëvizë në drejtim të kundër.
Mediat rumune shkruajnë se mesfushori nuk është në mesin e lojtarëve në të cilët llogarit Cluji.
Madje ai më nuk figuron as në mesin e lojtarëve të prezantuar në faqen zyrtare të klubit.
