Me çekan e pajisje të tjera, punonjësit e restaurantit “Grey” po i largojnë edhe pjesët e fundit.
Kështu në orët e para të mëngjesit të së mërkurës, terasa e restaurantit që i takon kryeterroristit, Millan Radojiciq i cili është përgjegjës për sulmin e 24-shtatorit në Banjskë të Zvecanit, po largohet nga sheshi “Car Lazar” në veri të Mitrovicës.
Kjo pasi që drejtoria e Inspekcionit të komunës së Mitrovicës së veriut, punonjësve u dha 12 orë afat për të larguar këtë terasë e cila është vendosur në pronë publike.
Kryesuesi i kuvendit komunal të kësaj komune, Nexhat Ugljanin thotë se përveç njerëzve të afërt të Radojiciq, në të kanë qëndruar edhe anëtarë të Listës Serbe.
“Ai restauranti që gjithmonë e dimë në shërbim të kujt ka punuar edhe vet e keni parë cila zyre është në kuadër asaj terase, faktikisht është edhe uzurpimi që është për shërbimin dhe shëtitjen e qytetarëve. Por, sigurisht edhe atë ditë që kanë ardhë ka ardhe deri te provokimet sidomos nga personat e atij restauranti sepse aty dihet që rrinë njerëzit nga Lista Srpska”, ka thwnw ai
Sipas tij, Lista Serbe do të ankohet tek faktori ndërkombëtar kinse për dëmtim ekonomik të biznesit, por sipas tij, hapësirat publike duhet të lirohen.
“Tash do të mundohen që për arsyeje të këtij manifestimi edhe pengesës nga restauranti do të ndikojnë përmes medieve me i bë thirrje bashkësisë evropiane edhe tjerat, kinse po cenohet edhe ekonomia e komunitetit serb. Por jo, thash sepse ne kur kemi votuar lirimin e hapësirës publike, ne kemi votuar pa marrë parasysh kush, cfarë apo cilit nacionalitet është”, shprehet Ugljanin
Lidhur me këtë, zëvendësdrejtori për veriun e Kosovës, Veton Elshani ka bërë të ditur se njësitë policore kanë qëndruar aty gjatë aksionit, por që s’ka pasur nevojë për asistencë.
“Ne kemi informacion që dje ka shkuar Inspektorati i Punës atje që ta jap një vendim për largim të asaj terrase. Policia ka pasur informacion për këtë vendim, pasi që edhe vetë kemi qenë prezentë aty. Nuk ka pasur nevojë që ne me asistua Inspektoratin në marrje të ndonjë veprime për arsye se janë duke u kryer veprimet. Nuk është diçka e jashtëzakonshme që ne me ofrua asistencë sa herë që institucionet e Republikës së Kosovës kërkojnë të njëjtën gjë nga ne. Por, në këtë rast nuk ka ndodh”, ka thwnw Elshani.
Ditë më parë, nga kjo terasë po provokoheshin disa shqiptarë që morën pjesë në koncertin jaz të organizuar në veri nga këngëtarja, Rona Nishliu.
