Ish zv/ministri i Arsimit, Jusuf Thaçi ka dhënë një propozim se si duhet të trajtohet nga shteti çështja e teksteve shkollore.
Thaçi ka propozuar që shteti të krijojë Institutin Shtetëror për Tekste Shkollore dhe Materiale Mësimore, i cili do të hartonte tekstet e reja shkollore.
“1. Shteti e krijon Institutin Shtetëror për Tekste Shkollore dhe Materiale Mësimore, i cili merret me krejt procesin e hartimit të testeve shkollore, duke mundësuar konkurrencë mes autorëve, e duke i nxjerrë nga loja shtëpitë botuese”, ka shkruar ai.
Tutje ai propozon që tekstet e shkencave të natyrës të përkthehen nga gjuhë të huaja.
“2. Tekstet shkollore të matematikës, të shkencave të natyrës dhe të disa shkencave shoqërore merren nga shtëpitë botuese perëndimore, përkthehen e përshtaten për rrethanat e ambientin tonë dhe futen në përdorim në shkollat tona. Për këto tekste nuk ka nevojë për autorë vendorë, sepse përdoren terme e koncepte universal”, ka shkruar tutje ai.
Sipas Thaçit, këto propozime janë të evidentuara në procesverbale nga Ministria e Arsimit.
“Këto zgjidhje i ka të evidencuara Ministria e Arsimit në procesverbale (të shkruara dhe audio) gjatë hartimit të draft-ligjeve për tekste shkollore dhe materiale mësimore që prej kohës së ministrit Arsim Bajrami e deri te koha e ministres Arbërie Nagavci. Pse i kanë injoruar e po i injorojnë, ata i dinë arsyet”, ka shkruar Thaçi në Facebook.
