Kanali 12 i Izraelit ka transmetuar regjistrime të publikuara të ish-shefit të inteligjencës ushtarake izraelite, Aharon Haliva duke thënë se, “Për çdo person të vrarë më 7 tetor, duhet të vdesin 50 palestinezë.”
Ai më tutje dëgjohet duke thënë se këto vrasje janë “të nevojshme për brezat e ardhshëm.”
Ai vazhdoi duke thënë se “ata kanë nevojë për një Nakba herë pas here për të ndjerë çmimin”, duke iu referuar spastrimit të dhunshëm etnik të Palestinës në vitin 1948 nga milicitë sioniste.
Haliva mund të dëgjohet më tutje duke këmbëngulur se vrasjet “nuk janë hakmarrje”, por më tepër një “pengesë për brezat e ardhshëm”.
Grupi palestinez Hamas ka reaguar ndaj komenteve të fundit të Halivas, duke thënë se ato janë “një pranim i qartë i doktrinës gjenocidale” të Izraelit.
Një deklaratë e Hamasit në Telegram tha: “Thirrja e Haliva-s për të vrarë 50 palestinezë për çdo izraelit, pavarësisht nëse janë fëmijë apo gra, është një politikë sistematike kriminale.”
Ata i kanë bërë thirrje Kombeve të Bashkuara dhe dhe gjykatave ndërkombëtare që t’i dokumentojnë këto rrëfime./teve1
