George Robertson, ministër i Mbrojtjes së Mbretërisë së Bashkuar gjatë luftës në Kosovë ka arritur të hënën në mbrëmje në Kosovë.
Ai është pritur në Aeroportin “Adem Jashari” nga ministrja e Jashtme Donika Gërvalla.
Gërvalla ka thënë se Robertson i cili ka qenë edhe ish-sekretar i NATO-s është një mik i Kosovës dhe kontributi i tij në çlirimin e Kosovës ka qenë i pazëvendësueshëm.
“Në orët e vona të mbrëmjes, sapo prita në Aeroportin e Prishtinës “Adem Jashari”, Lordin George Robertson. Gjatë luftës në Kosovë ai ishte Ministër i Mbrojtjes së Mbretërisë së Bashkuar ndërsa menjëherë pas luftës, Sekretar i Përgjithshëm i NATO-s. Lordi Robertson është një mik i shquar i Kosovës dhe kontributi i tij në çlirimin e vendit tonë i pazëvendësueshëm. Bashkë me të dhe miq të shumtë ndërkombëtarë po e shënojmë gjatë këtyre dy ditëve me aktivitete të ndryshme 25-vjetorin e çlirimit të Kosovës”, ka shkruar Gërvalla./teve1.info/
