Deri në korrik të vitit të kaluar, punonte në Policinë e Kosovës.
Mirëpo, Bojan Jevtiq u arrestua nën dyshimet për spiunazh tek BIA serbe.
Mbi Jevtiqin rëndojnë akuzat për dërgim të informacioneve të ndjeshje që cënojnë rendin kushtetues tek zyrtarët e BIA-s.
Vet Jevtiq e pranoi fajësinë për këto akuza të rënda të ngritura nga Prokuroria Speciale.
Madje, këtë ai e bëri në një fazë krejt të hershme të hetimeve.
Rrjedhimisht, mes prokurorisë speciale dhe Bojan Jevtiq u arrit marrëveshje për pranim të fajësisë.
Nga mbrojtja e Jevtiq, u kërkua që në verdiktin e Gjykatës, të merren parasysh rrethana lehtësuese.
“I pandehuri qysh në fazën e hetimeve, para ngritjes së aktakuzës ka arritur marrëveshje me prokurorinë speciale edhe ka kontribuar mjaft në shkurtimin e kësaj procedure; i njëjti s’ka qenë asnjëherë i dënuar; ai ka treguar një pendim të thellë njerëzor”, ka thënë Nikoliq.
Gjykata e pranoi marrëveshjen e arritur mes palëve.
Para verdiktit, Jevtiq tha disa fjalë.
“Jam baba i tre fëmijëve të mitur dhe kujdesem për ta. Në familjen time askush nuk është dënuar. Si zyrtar policor e kam kryer punën me ndershmëri. Kërkoj nga Gjykata dënimin minimal…”, u shpreh Jevtiq.
Pas dëgjimit të të gjitha palëve, Gjykata vendosi që Jevtiqin ta dënoj me gjashtë vite burgim dhe dy mijë euro gjobë.
Jevtiqit iu konfiskua edhe dy milionë dinarë serbë, 7 mijë euro dhe 5 mijë franga zviceriane, të cilat sipas prokurorisë janë dobia pasurore e togerit për spiunazh.
Që prej momentit të arrestimit, Jevtiq ndodhet në paraburgim, kohë e cila do t’i llogaritet në vuajtjen e dënimit.
