Nga ish-kolegët, i prangosur u soll në sallën e gjyqit.
Është ky ish-polici, Festim Ramadani, mbi të cilin rëndon akuza për vrasje të rëndë.
E pas tij, në gjykatore të enjten u soll edhe Jeton Misini.
Të dy këta, po akuzohen për vrasjen e Sadri Sadriut, që ndodhi në gushtin e vitit 2024 në parkingun e një salle dasmash në Ferizaj.
Para se seanca të fillonte, dy të akuzuarit u përshëndetën në këtë mënyrë.
Ndërsa asnjëri prej tyre, nuk e pranoi fajësinë.
“Nuk e pranojë fajësinë”, u shpreh Ramadani
“Nuk e pranojë fajësinë”, tha Jeton Misini i akuzuar.
Por, gjatë këtij procesi, këtë do ta sfidojë prokurori i rastit, Valdet Avdiu.
“Do të prezantohen edhe provat materiale përfshirë edhe video incizimet nga vendi i ngjarjes dhe marrë së bashku edhe me provat personale do të dëshmojnë në tërësi se ngjarja ka ndodhur ashtu siç është përshkruar nga akti akuzues”, tha ai.
I bindur në fajësinë e dy të dyshuarve, të enjten u shfaq avokati i familjes së dëmtuar.
“Nga provat të cilat janë të propozuara në aktakuzën lëndore e të cilat janë të listuara në mënyrë recidive, do të vërtetohet se kjo akuzë është e bazuar ligjërisht e hartuar në konform të dispozitave te Kodit të Procedurës Penale”, tha avokati i familjes së dëmtuar, Shemsedin Pira.
Në këtë seancë, i akuzuari Ramadani njoftoi se liroi nga detyra avokatin e tij, Xhemail Ahmeti pasi vlerësoi se mund të mbrohet vetë në këtë çështje.
Andaj, në fjalën hyrëse, u shpreh se aktakuza ka mangësi.
“Prokurori nuk ka shpjeguar shkaqet që kanë shkuar deri te vrasja… Ajo që është tragjike e Prokurori nuk e merr parasysh është që ne si familje dhe e Jeton Misinit kemi vuajtje prej 100 vitesh nga i njëjti viktima i cili ka shumë viktima”, u shpreh Ramadani.
Sipas tij, ai do të shpallet i pafajshëm, por ka edhe një kërkesë nëse del fajtor.
“Dhe deklaroj se në bazë të të gjitha provave që i ka propozu Prokurori në aktakuzë unë vlerësoj se nuk qëndrojnë të bazuara dhe në fund do të shpallem i pafajshëm. Por në rast se Gjykata më gjen dhe shpallë fajtor i propozoj që në fillim të shqyrtimit gjyqësor të më shqiptojë dënim në minimum, marrë për bazë dispozitë ligjore në kufijtë e zbutjes”, deklaroi i akuzuari Ramadani.
Derisa avokati i të akuzuarit Misini, u shpreh se akuza për klientin e tij në ndihmë të kësaj vepre penale nuk qëndron.
“Pretendimet e akuzës ndaj klientit tim që në ngjarjen kritike ka ndërmarrë veprim të krijimit dhe sigurimit për t’u kryer veprimi në ngjarje kritike edhe në shikim të parë është i pabazuar. Rasti konkret i momentit kur është shkrepur arma nga i pandehuri i parë gjatë asaj kohe klienti im ka qenë në veturën e tij dhe si ka mund me kry në një distancë që objektivisht nuk ka pasë në mënyrë absolute me marrë ndonjë veprim”, tha Avni Ibrahimi, avokat i të akuzuarit Jeton Misini.
Ndryshe, sipas aktakuzës, i pandehuri më 16 gusht 2024, gjatë një ceremonie martesore, me dashje dhe paramendim, me qëllim hakmarrjeje për motive të pretenduara familjare, në prani të dhjetëra personave, me armë zyrtare automatike të policisë, me dashje dhe qëllim të privimit nga jeta, me breshëri plumba shtien në drejtim të viktimës Sadri Sadriu.
Kurse Jeton Misini akuzohet se me dashje e ka ndihmuar policin në privimin nga jeta të viktimës ashtu që i pajisur me mjet të forta, ka mbrojtur perimetrin e sulmit dhe ka parandaluar çdo ndërhyrje, në mënyrë që Ramadani të realizonte pa pengesë veprën penale të vrasjes së rëndë.
