Vendosja e flamurit kombëtar e fotografisë së komandantit legjendar, Adem Jashari i kushtoi me suspendim në shkurt të vitit të kaluar.
Zymer Kodra që shërbeu për 25 vite në Policisë së Kosovës, nga kjo kohë u përballë me padrejtësi të shumta në vendin e punës.
E pas kësaj periudhe, në mars të këtij viti, ai dha dorëheqje vullnetare nga uniforma e shtetit.
Kodra që është edhe ushtar i Ushtrisë Çlirimtare të Kosovës, thotë se deri te ky hap erdhi pasi iu prekën vlerat e idealit.
“Ai ideali, ato flamuri kombëtar flamuri i Adem Jasharit, ato nuk po çojnë peshë më janë apo s’janë, ndjenjat po zbehen në përgjithësi sidomos te institucioni, atëherë vendosa të mos heshti më dhe fola. Pasi fola dhe e shpreha atë të cilën e pata, dikujt nuk i konvenoi dhe filloi të merr masa ndaj meje, dhe vendosa me dhënë dorëheqje”, tha ish-rreshteri policor, Zymer Kodra.
Ish-rreshteri policor thotë se marrja e vendimit nuk ishte e lehtë, por që nuk kishte zgjidhje tjetër.
“Më tepër se dy dekada me shërby me një institucion më të besueshmin në vend dhe përfundimisht me dhënë dorëheqje, padyshim që është e vështirë. Unë e kam dashtë uniformën, e du uniformën, e respektoj e kam respektu gjithëherë, por nuk ka qenë e vështirë për arsye se kur kuptova unë se aty më nuk po përfillen ato simbole, ta quajë ndoshta edhe po përdhosen”, tha Kodra.
Derisa vlerëson se kontributin e tij ndaj vendit do ta japë në forma tjera.
“Për ato simbole me i mbajtë ndjenjat, me i mbajtë në zemër hala, s’mujta me pranu me qenë shërbyes i një institucioni ku momentin që preken simbolet kombëtare, momentin kur fotografia e Adem Jasharit hiqet prej murit dhe nuk çon peshë, nuk lëvizë institucioni një diçka, nuk mujta me pranu. Andaj vendosa me dhënë dorëheqje për me gjetë një mënyrë tjetër por jo në shenjë revolte por për me gjetë një mënyrë tjetër me kontribu për atë gjak që është derdhë”, tregoi ai.
Kodra tashmë ka botuar një libër me rrëfime nga bashkëluftëtarët e tij të Ushtrisë Çlirimtare të Kosovës.
