Policia e Kosovës, Drejtoria për Hetimin e Krimeve të Luftës, ka arrestuar sot në fshatin Soçanicë të Leposaviqit një të dyshuar mashkull, shtetas kosovar i nacionalitetit serb, nën dyshimin për “Krime lufte kundër popullatës civile”.
Sipas Policisë së Kosovës, i dyshuari dyshohet se gjatë luftës në Kosovë ka qenë pjesëtar i Ministrisë së Punëve të Brendshme të Serbisë (MUP), i sistemuar në Stacionin Policor në Skenderaj.
Ai dyshohet se në mars të vitit 1999, i uniformuar dhe i armatosur, në bashkëkryerje me pjesëtarë të tjerë të një grupi të organizuar, ka marrë pjesë në operacione policore-ushtarake kundër civilëve shqiptarë.
“Gjatë këtyre operacioneve dyshohet se janë kryer dëbime me dhunë të civilëve nga pronat e tyre, rrahje, torturime, plagosje dhe vrasje e 15 civilëve shqiptarë, si dhe zhdukja e 16 civilëve të tjerë në dy lokacione në Skenderaj”, thuhet në njoftim.
Policia ka bërë të ditur se i dyshuari është intervistuar në prani të avokatit, ndërsa me aktvendim të prokurorit të rastit i është caktuar masa e ndalimit prej 48 orësh.
