Avni Qenaj, ish-pjesëtar i Ushtrisë Çlirimtare të Kosovës, është liruar pas arrestimit të tij më 26 nëntor të vitit të kaluar nga policia serbe në vendkalimin kufitar të Merdarës.
Lajmi për lirimin e tij është konfirmuar nga faqja “Hasi Heroik”. Qenaj, që është rreth 53 vjeç, u mbajt për disa muaj në burgun qendror të Beogradit dhe është liruar sot.
Qenaj është nga fshati Romajë i Prizrenit dhe ka qenë pjesë e Brigadës 138 “Agim Ramadani” në Koshare gjatë luftës.
Gazmend Syla, nënkryetar i Organizatës së Veteranëve të Luftës së UÇK-së (OVL-UÇK), deklaroi se dyshohet se gjatë kontrollit të Qenajt, policia serbe ka gjetur kartelën e anëtarësisë të tij në UÇK.
Kjo ka shtuar dyshimet se arrestimi mund të ketë lidhje me aktivitetet e tij gjatë periudhës së luftës.
Qenaj ishte një nga shumë ish-pjesëtarët e Ushtrisë Çlirimtare të Kosovës që u përballën me procedura ligjore dhe ndalime nga autoritetet serbe pas përfundimit të luftës.
