Që nga data 7 qershor, ish polici Njësisë Speciale Operative (NjSO), Arbnor Spahiu është duke qëndruar në qendrën e ndalimit në Kanjizë të Serbisë.
Të shtunën derisa ishte duke udhëtuar së bashku me familjen e tij në Gjermani, Spahiu u ndalua nga autoritet serbe.
Avokati Arianit Koci ka treguar për Tëvë1 se Spahiu është intervistuar gjatë pasdites nga Prokuroria.
Autoritetet serbe, Koci tregon se u interesuan për rastin Banjska.
“Ndërmjet tjerash ai është pyetur edhe për rastin Banjska e ky në atë kohë nuk ka qenë polic, pasi disa muaj më herët e ka lëshuar detyrën. Gati një vit më herët ai jeton në Gjermani e ka lejen dhe vizën e punës. Kjo është një familje që shumë ka kontribuar për Kosovën predhe babë edhe djalë polic, shteti nuk po ia kthehen si duhet kontributi”, ka thënë Koci.
Koci mes tjerash ka thënë se shumë shpejt ish polici do të lirohet.
“Ai është shumë mirë, ai është djali i mirë, djali i fortë, ai nuk ka lidhje fare. Mbrëmë kam ardhur në 2 të natës prej Beogradi. I kam mbledhur provat e kam vëzhguar situatën nuk ka asnjë për dyshime të cilat e rëndojnë atë. Unë detaje sot nuk mundem me dhënë për publiku, por jam i sigurt që ai shumë shpejt do të kthehet”, është shprehur Koci.
Për këtë rast, ministrja në detyrë e punëve të jashtme, Donika Gërvalla, tregoi se i kanë njoftuar ndërkombëtarët.
“Kemi informuar edhe në Kosovë edhe në Beograd misionet e huaja diplomatike kemi kërkuar ndihmën e tyre kemi kërkuar qartësi dhe shpresojmë që çështja sot të qartësohet dhe ai të mos mbahet fare për 48 orë. Por me lejoni të bëjë një thirrje për kujdes të veçantë për të gjitha ata të cilët, sidomos tani që po afrohen vera që kalojnë nga Serbia pasi rastet e ndalesave arbitrare janë shtuar gjatë muajve dhe viteve të fundit”, tha Gërvalla
Javë më parë, autoritetet serbe kishin ndaluar për shtatë orë edhe ish deputetin e Lëvizjes Vetëvendosje Gramos Agusholli, të cilin e kishin pyetur për lidhshmërinë e tij më kreun e partisë, Albin Kurtin si dhe rreth UÇK-së.
