Ish-luftëtari i UÇK-së, Arientin Abdyli, ka mbajtur fjalim në protestën gjithëpopullore të organizuar në Prishtinë, duke thënë se shqiptarët sot po e ngrisin zërin kundër, siç u shpreh ai, padrejtësive ndaj ish-krerëve të UÇK-së.
Abdyli tha se Hashim Thaçi, Kadri Veseli, Jakup Krasniqi dhe Rexhep Selimi janë “shënuesit e lirisë” së Kosovës.
“Luftën tonë e bëmë pa maska, pa marre dhe të drejtë. Sot jemi mbledhur këtu jo vetëm për të ngritur zërin për padrejtësinë kundër katër komandantëve tanë, por për të mbrojtur një të vërtetë e cila nuk thyhet assesi me asnjë vendim”, tha Abdyli.
Ai shtoi se qytetarët janë rreshtuar në përkrahje të ish-krerëve të UÇK-së, të cilët po gjykohen në Hagë.
“Jemi rreshtuar në përkrahje të katër krerëve, të cilët po mbahen padrejtësisht në Hagë. Hashim Thaçi, Kadri Veseli, Jakup Krasniqi e Rexhep Selimi nuk janë veç emra, ata janë shënuesit e lirisë sonë, ata janë simbolet e një epopeje, janë simbolet e një populli që refuzoi të nënshtrohet”, u shpreh ai.
