Gati një muaj pasi iu ngrit aktakuza për deklarim të rremë të pasurisë, ish-ministri për Komunitete dhe Kthim GoranRakiq vendosi të bashkëpunojë me institucionet e drejtësisë dhe ta pranojë fajin.
Të mërkurën doli para gjykatës duke pranuar se në vitin 2020 kishte vepruar në kundërshtim me ligjin dhe nuk kishte deklaruar saktë pasurinë.
Ndaj, pas aprovimit të kësaj marrëveshje, gjykata e dënoi me 3 muaj burg me kusht si dhe e gjobiti me 1 mijë euro.
“Të akuzuarin e gjykon, i cakton dënim me burgim prej 3 muajve sikurse edhe dënimi me gjobë në shumë prej 1 mijë euro”
Para se të merrej vendimi, prokurori i rastit Ali Ajdini lexoi aktakuzën.
“Nuk ka paraqitur saktë të dhënat e kërkuara, respektivisht duke mos i deklaruar të hyrat e tjera vjetore të përfituara nga funksioni që mban në shkollën e lartë ekonomike në Pejë dhe në ndërmarrjen publike në Mitrovicë”
Edhe mbrojtësi i ish-kryetarit të Listës Serbe dhe vet Rakiq, u pajtuan me marrëveshjen e arritur për pranimin e fajësisë.
“Me datë 25.04.2024 gjatë intervistimit të mbrojturit tim kemi mbet para kësaj kërkese dhe kemi kërku që kjo marrëveshje të lidhet”, tha Asdren Hoxha, avokat i Rakiq.
“Mbesë pranë asaj deklarate që kam dhënë në Prokurori dhe marrëveshjes për pranimin e fajësisë”, tha Rakiq pas vendimit.
Sipas aktakuzës së përpiluar më 2 maj 2024 nga Prokuroria Themelore në Prishtinë, thuhet se Rakiqi edhe pse ka qenë i obliguar të bëjë deklarimin e pasurisë në formular, nuk ka paraqitur saktë të dhënat e kërkuara.
