Ish-kryeministri izraelit, Ehud Olmert deklaroi të shtunën se kolonët izraelitë të paligjshëm janë duke vrarë palestinezë çdo ditë në Bregun Perëndimor të pushtuar.
Në një intervistë për Channel 13 TV, Olmert theksoi se dhuna e kolonëve ndaj palestinezëve në “Judea dhe Samari” (emërtimi izraelit për Bregun Perëndimor) është e përditshme dhe akuzoi grupin ekstremist të djathtë “Hilltop Youth” për kryerjen e krimeve të luftës.
Ai kundërshtoi pretendimet se ky grup përbën një pakicë, duke thënë: “Kjo është një gënjeshtër. Ata nuk janë pakicë – ata gëzojnë mbështetje. Pa të, nuk do të ishin në gjendje të vepronin kështu.”
Më 21 maj, Olmert i tha BBC-së se administrata izraelite në Tel Aviv po kryen krime lufte jo vetëm në Gaza, por edhe në baza të përditshme në Bregun Perëndimor.
Më 11 korrik, kolonë izraelitë që kishin uzurpuar tokë palestineze sulmuan një palestinez dhe vranë një tjetër në qytetin Sinjil, në veri të Ramallahut.
Sipas Ministrisë Palestineze të Shëndetësisë, që nga tetori 2023 – kur filloi lufta në Rripin e Gazës – të paktën 998 palestinezë janë vrarë dhe mbi 7,000 të tjerë janë plagosur në Bregun Perëndimor, si pasojë e sulmeve të ushtrisë izraelite dhe kolonëve.
Në Gaza, numri i të vrarëve ka arritur afërsisht në 58,000, shumica prej tyre gra dhe fëmijë.
Në korrik të vitit të kaluar, Gjykata Ndërkombëtare e Drejtësisë e shpalli të paligjshëm pushtimin shumëvjeçar të territoreve palestineze nga Izraeli dhe kërkoi largimin e menjëhershëm të vendbanimeve izraelite nga Bregu Perëndimor dhe Jerusalemi Lindor.
Ndërkohë, Gjykata Ndërkombëtare Penale lëshoi nëntorin e kaluar urdhër-arreste për kryeministrin izraelit Benjamin Netanyahu dhe ish-ministrin e Mbrojtjes Yoav Gallant, për krime lufte dhe krime kundër njerëzimit në Gaza.
