Letrat nga lufta i ruan me shumë kujdes.
E ndonëse shkrimi është zbehur nga koha, vendimet e atëhershme i lexon shpesh herë.
Sikurse këto, në një pjesë të oborrit ka mbetur si relikt, edhe oda e vjetër në Pagarushë të Malishevës, ku Ruzhdi Kryeziu priti e përcolli qindra ushtarë.
Në mesin e tyre, edhe ish- drejtorin politik të Ushtrisë Çlirimtare të Kosovës, Hashim Thaçin.
“Më së paku, 40-50 herë këtu në këtë odë ka hongër bukë Hashim Thaçi. I ka dashtë ushtarët më fort se veten. Ka qëllu këtu kur kanë zbrit para sabahut, në mëngjes n’8 a n’9 dimër, të lagt e të mërdhitë, është çu prej ode, le të hynë ushtarët brenda, le të pushojnë le të nxehen. Ka nejt jashtë në oborr”, shprehet Kryeziu.
Duke shërbyer si Komandant Togu në Batalionin e dytë gardist pranë Zonës së Pashtrikut, Kryeziut i ra të ballafaqohet edhe me Kadri Veselin.
Mirëpo këtë të fundit nuk e njihte.
“Tri herë i vetmi Kadri Veseli civil që është hi nëpër tana pikat kah ka pasë luftime në qytet që i ka vizitu. Dy herë jam përla me të se nuk e kam njoftë. Çka ki që po m’i huton ushtarët, çka po flet. T’u i pytë edhe civilët çka po bëjnë e të kahit janë këta ushtarë, prej cilit njësit janë edhe ushtarët për kush ka qenë përgjegjës, a i qet ushtarët në rrugë e vet rrin fsheht me naj bodrum”, shprehet ish-komandanti
E pas dhjetë ditësh, Kryeziu rrëfen se si e thirrën në Shtab të Përgjithshëm.
“Tha e ke një revole dhuratë 15-she prej Kadri Veselit. Thashë aa s’koka idhnu që i kam vikat? Jo tha, bakshish e ke një revole prej tij. Unë kam marr në Rahovec si përgjegjës i grupit edhe një i brigadës 121, kush është nuk e di; dy vetë ishim kanë që kemi marrë dhuratë prej Kadri Veselit”, tregon ai.
Kryeziu shpreson që ish krerët e UÇK-së të lirohen sa më shpejt.
Gjatë periudhës së luftës, ai shërbeu si Komandant Togu.
Ndërsa shtëpia e tij shërbeu si strehë për ushtarë dhe si kazermë e depo e armatimit të ushtrisë çlirimtare të Kosovës.
