Nuk ka zgjatur më shumë se një sezon aventura e Jocelyn Gourvennec në stolin e Lille. Skuadra franceze fitoi titullin kampion në vitin 2021 nën drejtimin e Christophe Galtier, por sezoni i fundit ishte për t’u harruar në kampionatin francez.
Lille nuk shkoi më shumë se vendi i nëntë në renditje. Ecuria negative ka ndikuar që drejtuesit e klubit të Ligue 1 të ndërpresin bashkëpunimin me Gourvennec, vendim që e kanë zyrtarizuar në një postim në rrjetet sociale.
Pavarësisht problemeve në kampionat, Lille ia doli të kualifikohet në raundin e 1/8-ve në Champions League, raund ku u eliminua nga Chelsea. Klubi falënderon 50-vjeçarin për profesionalizmin dhe i uron suksese në të ardhmen.
Emri që cilësohet si kandidati kryesor për t’u ulur në pankinën e Lille, është Paulo Fonseca. Portugezi ka punuar më parë me klube si Roma, Porto, Shakhtar Donetsk apo Braga.
