Ish-gjenerali amerikan Wesley Clark, i cili udhëhoqi NATO-n gjatë luftës në Kosovë, është konfirmuar zyrtarisht si dëshmitar i mbrojtjes në gjyqin ndaj ish-krerëve të Ushtrisë Çlirimtare të Kosovës në Hagë.
Clark ka drejtuar fushatën 78-ditore të bombardimeve të NATO-s kundër forcave serbe, të cilat kryenin gjenocid ndaj shqiptarëve, duke luajtur një rol kyç në largimin e regjimit të Beogradit nga Kosova. Për këtë arsye, dëshmia e tij konsiderohet thelbësore dhe pritet të sfidojë akuzat e Prokurorisë së Hagës për “Ndërmarrje të Përbashkët Kriminale”.
Ekspertët e mbrojtjes theksojnë:
“Nëse UÇK-ja do të cilësohej si organizatë kriminale, atëherë edhe NATO – e cila bashkëpunoi ngushtë me të gjatë operacioneve ushtarake – do të duhej të akuzohej për të njëjtin krim.”
Clark pritet të shpjegojë para gjykatës se UÇK-ja ishte partner i NATO-s në një luftë të drejtë për çlirim kombëtar.
Ish-gjenerali amerikan është dëshmitari i pestë i mbrojtjes. Para tij kanë dëshmuar:
James Rubin, ish-ndihmëssekretar amerikan i Shtetit gjatë luftës;
Paul Williams, këshilltar i delegacionit të Kosovës në Rambuje;
John Duncan, ish-këshilltar i Clark;
Jock Covey, zëvendëskryeadministrator i Kosovës në periudhën 1999–2001.
Dëshmitarët e mbrojtjes do të vazhdojnë të dëgjohen deri nga mesi i nëntorit, me mundësi që kjo periudhë të zgjasë deri në fund të muajit. Pas përfundimit të dëshmive, palët do të kenë afat deri në dhjetor për të dorëzuar fjalët përfundimtare me shkrim, ndërsa vendimi final i Panelit të Gjyqtarëve pritet në fillim të vitit të ardhshëm.
Që nga 5 nëntori 2020, katër ish-krerë të UÇK-së – Hashim Thaçi, Kadri Veseli, Jakup Krasniqi dhe Rexhep Selimi – ndodhen në paraburgimin e Hagës.
