Nuhi Bytyqi, ish-gazetar në kohën e luftës thotë se ishte e këndshme kur gjatë kësaj periudhe kishin parë ndërtimin e një shkollë në malet e Berishës.
Në një rrëfim në emisionin “Info Nata” në Tëvë 1, ai thotë se kishin hasur rastësisht në ndërtimin e “shkollave prej najloni” , teksa shton se për ta ishte e rëndësishme filmimi i kësaj ngjarjeje.
“Duke ngjitur malet e Berishës hasëm rastësisht disa banorë të fshatit me arsimtarët dhe luftëtarët e tyre po bënin përpjekje për të ngritur tendën e najllonit që ishte për ne befasi e këndshme që nuk kishim pa tenda të tilla. Ishte moment i rëndësishëm për ne që t’i marrim imazhet dokumentare origjinale. S’kishim informacione se çka po ndodh, rastësisht i pamë dhe ishte e rëndësishme t’i plasojmë ato para oponinit”, tha ai.
Bytyqi tregon se kishin bërë incizimin e disa nxënësve teksa recitonin poezi që kishin për qëllim arritjen e lirisë së Kosovës dhe ato i kishin shfaqur në një emision special në Televizionin e Shqipërisë.
“Kemi arritë ta xhirojmë hyrjen e nxënësve në klasa aty të improvizuara shkuam tek klasa e parë deri te klasa e tretë dhe klasë tjera edhe mësuesi Sami Qelaj ishte duke i shpërndarë lapsat nuk kishte libra nga një fletore edhe nxënësit s’kishin as banka, as karrige. Ashtu dikush ulur kështu që ishte një moment i rëndësishëm për kameramanin të xhirojë në mënyrë të natyrshme, origjinale ato imazhe dhe pastaj unë insistova që në ditën e parë të mësimit të recitohen disa poezi nga nxënësit që ishin mësuar në klasat e mëhershme dhe i kemi xhiruar dhe kemi përgatit një emision special”, shtoi ai.
Tutje, ish-gazetari rrëfen se edhe në ato rrethana, nxënësit kishin vullnet të jashtëzakonshëm së bashku me mësuesit e tyre që të fitojnë dije.
Sipas tij, kjo e dëshmonte se populli i Kosovës krahas luftës ishte i interesuar të zhvillonte luftën për dije e civilizim.
“Edhe në ato rrethana të luftës dhe dëshmonte se populli i Kosovës krahas luftës ishte i interesuar të zhvillonte luftën për dije, civilizim europerëndimor dhe kjo me të vërtet mediat botërore kanë ardhë që i kanë xhiruar këto imazhe nga funksionimi i shkollës shqipe dhe kanë pasë një jehonë të jashtëzakonshme duke krijuar një përshtypje reale për gjendjen në ato ditë shtatori dhe përkundër granatimeve të vazhdueshme që nuk ishin shumë larg, mirëpo te nxënësit dhe arsimtarët nuk ekzistonte frika por vullneti i jashtëzakonshëm se populli i Kosovës do ta fitojë lirinë”, shtoi ai./teve1.info/
https://teve1.info/lajmet/16-cmime-per-filmin-e-shkollave-te-luftes/
