Një tjetër dëshmi tronditëse është shfaqur në gjyqin kundër reperit të njohur Sean “Diddy” Combs.
Një ish-e dashur e tij, e identifikuar si “Jane”, ka deklaruar para jurisë se Diddy e ka rrahur brutalisht vetëm pak javë pas publikimit të videos së dhunës ndaj Cassie-t, e cila u transmetua nga CNN në maj të vitit 2024.
Sipas dëshmisë së saj të dhënë të hënën, “Jane” ka treguar se nuk ishte takuar me Diddy për rreth një muaj pas daljes së videos me Cassie, deri në 18 qershor, kur ai e vizitoi në shtëpinë e saj në Los Angeles. Ajo e përshkroi atë ditë si “jashtëzakonisht të tmerrshme”.
Sipas Jane, Diddy sapo ishte kthyer nga një udhëtim familjar në Utah dhe po qëndronin në oborrin e shtëpisë së saj, duke konsumuar shampanjë dhe tekilë.
Gjatë bisedës, ajo e pyeti se me kë kishte qenë në udhëtim, dhe pas një përplasjeje verbale e quajti “pedofil”, duke aluduar se ai kishte qenë me një vajzë rreth 18–21 vjeçare, megjithëse ishte 25 vite më e re se ai.
Pas këtij momenti, situata sipas saj degradoi në dhunë fizike. Jane tha se i kishte shtyrë kokën Diddy-t në një banak mermeri dhe i kishte hedhur qirinj, duke i thënë se e urrente.
Ajo rrëfeu se ishte përpjekur të futej në dhomën e gjumit për t’u mbyllur, por Diddy kishte shkelmuar derën dhe kishte hyrë brenda.
Kur ajo u përpoq të fshihej në banjo dhe më pas në garderobë, ai sërish kishte ndjekur dhe hyrë me forcë.
Jane tha para jurisë se ishte përpjekur të dilte nga shtëpia, por Diddy e kishte kapur, e kishte goditur pas gjurit duke e rrëzuar dhe më pas e kishte marrë në një “chokehold” – një lloj shtrëngimi në qafë.
Ajo rrëfeu se kishte arritur të shpëtonte dhe ishte fshehur jashtë për afërsisht dy orë.
Kur ishte kthyer në shtëpi, duke menduar se ai ishte larguar, ajo pa Diddy në rrugë.
Pasi u fut sërish brenda dhe u mbyll në dhomën e miqve, ai, sipas saj, e kishte ndjekur dhe sërish kishte shkelmuar derën. Jane tha se përsëri i kishte hedhur qirinj dhe kishte vrapuar drejt verandës. Aty, ata kishin shkëmbyer goditje në fytyrë me njëri-tjetrin.
Pas përplasjes, Jane tha se kishte ikur në oborr dhe ishte shtrirë e përkulur në një cep, ndërsa Diddy e kishte goditur me grushta dhe shkelma, përpara se ta tërhiqte zvarrë për krahu dhe flokësh për ta futur në shtëpi.
Më pas, sipas dëshmisë së saj, ndërsa ndodhej në dhomën e gjumit me Diddy-n, ajo kishte përdorur telefonin e tij për të telefonuar vajzën për të cilën dyshonte se kishte qenë me të në Utah.
Gjatë telefonatës, vajza kishte filluar ta ofendonte, ndërsa Jane rrëfeu se Diddy e kishte mbajtur me forcë dhe e kishte detyruar ta dëgjonte të gjitha fyerjet.
Kjo nuk është hera e parë që gjatë gjyqit përmenden raste të dhunës fizike dhe psikologjike që përfshijnë Diddy-n.
Megjithatë, është e rëndësishme të theksohet se ai nuk është aktualisht i akuzuar zyrtarisht për dhunë në familje.
Përballë dëshmive të shumta që janë bërë publike në gjykatë, imazhi i Diddy-t po dëmtohet rëndë, ndërsa publiku dhe opinioni juridik presin me interes përfundimin e procesit gjyqësor/TAR
