Sulmuesi Sparta Pragës, Albion Rrahmani, dhe mesfushori i Clujit, Lindon Emërllahu, luajtën pak për Kosovën në fitoren 2:1 ndaj Islandës të enjten mbrëma, në ndeshjen e parë të plejofit për inkuadrim në Ligën B të Ligës së Kombeve.
Por, si Rrahmani, ashtu edhe Emërllahu, janë ndarë të kënaqur që Kosova e fitoi ndeshjen e parë, ndërsa synim tani kanë të marrin rezultat të mirë edhe në Murcia të Spanjës ku luhet ndeshja kthyese të dielën nga ora 18:00.
“Ndeshja e djeshme ka qenë shumë mirë e planifikuar nga ne. Po besoj se me meritë e kemi arritur këtë rezultat. Besoj që edhe në ndeshjen e dytë do ta bëjmë më të mirën dhe të kualifikohemi në Ligën B ku është edhe synimi jonë. Shpresoj që ta arrijmë këtë qëllim. Të gjithë janë të gëzuar për momentin dhe shpresoj që të vazhdojmë edhe të dielën”, ka deklaruar Rrahmani.
24-vjeçari ka zhvilluar 17 paraqitje në kampionatin elitar çek, ndërsa ka kontribuuar me katër gola e dy asistime.
Emërllahu 22-vjeçar që luan si mesfushor defensiv, në muajin shkurt iu bashkua Clujit rumun për 700 mijë euro nga Ballkani i Suharekës.
Njësoj si Rrahmani, edhe Emërllahu u inkuadrua në minutën e 88-të të ndeshjes.
“Ishte ndeshje mjaftë e mirë, duke marrë parasysh se Islanda është ekip shumë i fortë. Në pjesën e parë luajtëm mjaftë mirë, poseduam topin dhe patëm disa raste. Por në pjesën e dytë ishim më cinik para portës dhe erdhi fitorja. I falënderoj tifozët për mbështetjen. Shpresoj që edhe në Spanjë të jetë një numër sa më i madh për të na mbështetur. E kemi edhe një 90 minutësh tjetër. Nuk ka mbaruar ende asgjë. Në Spanjë do të shkojmë vetëm për fitore dhe me bindje që do të avancojmë në Ligën B”, është shprehur Emërllahu.
Emërllahu ka bërë pesë paraqitje me Clujin qëkur u transferua nga kampioni i tri edicioneve të fundit në Kosovë.
Kosova të premten e zhvilloi stërvitjen e fundit në Kampin Nacional në Hajvali, para udhëtimit në Spanjë.
Të premten stërvitën futbollistët që nuk ishin titullar, ndërsa pjesa tjetër e ekipit kanë përfunduar programin e rigjenerimit.
