Që nga fundi i muajit qershor kur u mor vendimi që të largohen nga qarkullimi targat me akronime të qyteteve të Kosovës, e që janë të lëshuara nga Serbia, kjo çështje vazhdimisht ka shkaktuar tensione.
E tani kur kanë mbetur edhe pak ditë që nga koha kur ky vendim duhet të hyj në fuqi, një pjesë e faktorëve ndërkombëtarë me ndikim, në vazhdimësi po kërkojnë nga kryeministri Albin Kurti, që të shtyjë afatin e fillimit të zbatimit të këtij vendimi.
Për këtë, ish-ambasadori i Shqipërisë në OKB, Agim Nesho, thotë se pavarësisht që Kosova ka të drejtë në këtë vendim, duhet ta shqyrtoi kërkesën e ndërkombëtarëve.
“Kërkesa e komunitetit ndërkombëtar, ajo biseda që pati sekretari i shtetit Blinken me kryeministrin Kurti, i cili i parashtroi ato gjëra që ju i thatë me të drejtë. Është një moment që qeveria e Kosovës, një qeveri mature dua të them unë, e përgjegjshme për përgjegjësitë që ka, sidomos në këtë situatë, duhet ta konsideroj, por ky është një vendim legjitim i organeve kryesore drejtuese të Kosovës”, thotë Nesho.
E ish-ambasadori i Kosovës në SHBA, Avni Spahiu thotë se mund të gjenden forma tjera të largimit të këtyre targave, pa shkaktuar tensione.
“Me rëndësi është që të mos ketë, të mos shkaktohen d.m.th tensione tepër të mëdha që mund të eskalojë në ndonjë konflikt. Unë mendoj që mund të gjenden modalitete se si të arrihet kjo çështja e regjistrimit në mënyrë më të lehtë pa ngritur tensionet e kështu me radhë, në mënyrë që edhe vendimi i Qeverisë të bejë në vend”, thotë Spahiu.
Qytetarët serbë që jetojnë në Republikën e Kosovës, kanë pasur 60 ditë kohë për të kaluar nga targat ilegale km në ato legale RKS.
Kronika e realizuar nga gazetari Valmir Gallopeni.