Televizioni shtetëror iranian të martën pasdite u ka bërë thirrje njerëzve të heqin WhatsApp nga telefonat e tyre inteligjentë, duke pretenduar pa prova specifike se aplikacioni i mesazheve mblodhi informacionet e përdoruesve për t’i dërguar në Izrael.
Në një deklaratë, WhatsApp tha se ishte “i shqetësuar se këto raportime të rreme do të jenë një justifikim që shërbimet tona të bllokohen në një kohë kur njerëzit kanë më shumë nevojë për to”. WhatsApp përdor enkriptim nga fillimi në fund, që do të thotë se një ofrues shërbimi në mes nuk mund ta lexojë një mesazh.
Enkriptimi nga fillimi në fund do të thotë që mesazhet janë të koduara në mënyrë që vetëm dërguesi dhe marrësi t’i shohin ato. Nëse dikush tjetër e kap mesazhin, e tëra çfarë do të shohë është një informacion i ngatërruar që nuk mund të dekodifikohet pa çelësin.
Gregory Falco, një profesor asistent i inxhinierisë në Universitetin Cornell dhe ekspert i sigurisë kibernetike, tha se është demonstruar se është e mundur të kuptohen meta të dhënat rreth WhatsApp që nuk enkriptohen.
Një çështje tjetër është sovraniteti i të dhënave, shtoi Falco, ku qendrat e të dhënave që strehojnë të dhëna të WhatsApp nga një vend i caktuar nuk ndodhen domosdoshmërisht në atë vend. Është më se e realizueshme, për shembull, që të dhënat e WhatsApp nga Irani të mos mbahen në Iran.
“Vendet duhet t’i ruajnë të dhënat e tyre brenda vendit dhe t’i përpunojnë ato me algoritmet e tyre. Sepse është gjithnjë e më e vështirë t’i besosh rrjetit global të infrastrukturës së të dhënave”, tha ai.
WhatsApp është në pronësi të Meta Platforms, kompania mëmë e Facebook dhe Instagram./AP/
