Irani të dielen ka mohuar edhe një herë të ketë ndihmuar grupin ushtarak jemenas, Huthi pasi presidenti amerikan, Donald Trump paralajmëroi se Teherani do të mbahet përgjegjës për veprimet e grupit.
Pas sulmeve ajrore të Shteteve të Bashkuara ndaj zonave ushtarake të Huthëve në Jemen, Ministria e Shëndetësisë së Jemenit ka thënë se sulmet kanë vrarë 31 njerëz, duke përfshirë gra dhe fëmijë, dhe u plagosën më shumë se 100 të tjerë, raporton AP.
Huthitë kanë shënjestruar në mënyrë të përsëritur anijet ndërkombëtare në Detin e Kuq dhe kanë lëshuar raketa dhe dronë në Izrael në ato që ata thanë se ishin akte solidariteti me palestinezët në Rripin e Gazës, gjatë kohës sa Izraeli ishte duke sulmuar Gazën.
Sulmet u ndalën kur një armëpushim u arrit në janar, por Huthitë kanë kërcënuar se do të rifillonin me sulme pasi Izraeli ndërpreu fluksin e ndihmave humanitare në Gaza këtë muaj.
Shtetet e Bashkuara dhe të tjerët kanë akuzuar prej kohësh Iranin për ofrimin e ndihmës ushtarake për Huthitë dhe Marina e SHBA-së ka sekuestruar pjesë raketash të prodhuara nga Irani dhe armë të tjera që tha se ishin të destinuara për grupin ushtarak jemenas, i cili kontrollon kryeqytetin e Jemenit, Sanaa, dhe veriun e vendit.
Ministri i Jashtëm iranian Abbas Araghchi, në një postim në X, i kërkoi SHBA-së të ndalojë sulmet dhe tha se Uashingtoni nuk mund të diktojë politikën e jashtme të Iranit.
Trump të shtunën ishte zotuar se do të përdorte “forcë dërrmuese vdekjeprurëse” derisa Huthitë të pushonin sulmet e tyre ndaj transportit detar përgjatë korridorit jetik detar.
Sulmet ajrore vijnë disa ditë pasi Huthitë thanë se do të rifillonin sulmet ndaj anijeve izraelite që lundronin në Jemen, në përgjigje të bllokadës së fundit të Izraelit në Gaza. Që atëherë nuk është raportuar asnjë sulm nga Huthitë.
