Kreu i agjencisë bërthamore të Iranit ka refuzuar të mërkurën inspektimin e objekteve bërthamore të bombarduara të vendit para se mbikqyrësi i OKB-së të “definojë kushtet e pasluftës”.
Mohammad Eslami tha se Irani nuk do të lejojë inspektime të vendeve bërthamore të bombarduara nga SHBA-të në qershor derisa Agjencia Ndërkombëtare e Energjisë Atomike (IAEA) të përcaktojë një kornizë të qartë për inspektimin e këtyre objekteve.
Ai tha se nëse përcaktohen kushtet e pasluftës, agjencia bërthamore e OKB-së duhet t’i njoftojë zyrtarisht ato, në mënyrë që Irani të mund të veprojë në përputhje me rrethanat dhe të lejojë inspektimet e vendeve, citon Anadolu.
Gjatë një konflikti 12-ditor me Izraelin, ushtria amerikane sulmoi tre objekte bërthamore iraniane – Fordo, Natanz dhe Isfahan – me bomba bunker-shkatërruese në “Operacionin Çekiri i Mesnatës”.
Sulmet pasuan një ofensivë izraelite që vrau komandantë ushtarakë dhe shkencëtarë bërthamorë. Pas kësaj, Irani dëboi inspektorët e IAEA-s.
Disa ditë para sulmit, i cili çoi në një përshkallëzim dramatik të tensioneve midis dy armiqve të përbetuar, Bordi i Guvernatorëve të IAEA-s kishte miratuar një rezolutë të fortë duke akuzuar Iranin për mosrespektim të angazhimeve të tij.
