Iraku njoftoi të dielën vonë për përfundimin e fazës së parë të misionit të koalicionit ndërkombëtar kundër ISIS-it (Daesh), raportoi Agjencia Irakiane e Lajmeve.
Sipas një deklarate të Komitetit të Lartë Ushtarak për Përfundimin e Misionit të Koalicionit Ndërkombëtar në Irak, të gjithë këshilltarët e koalicionit janë larguar nga bazat ushtarake dhe selitë e komandës në zonat federale të Irakut, duke ia dorëzuar kontrollin e plotë forcave irakiane.
Këshilltarët e fundit u tërhoqën nga Baza Ajrore Ain al-Asad në provincën Anbar dhe nga selia e Komandës së Operacioneve të Përbashkëta. Ministria e Mbrojtjes e Irakut konfirmoi më herët se ushtria irakiane kishte marrë kontrollin e plotë të bazës Ain al-Asad pas largimit të forcave amerikane.
Pas këtij zhvillimi, Bagdadi kaloi në një marrëdhënie dypalëshe sigurie me SHBA-në, e cila do të fokusohet në bashkëpunimin ushtarak, trajnimin, pajisjet, ushtrimet dhe operacionet e përbashkëta për forcimin e kapaciteteve të forcave të armatosura irakiane dhe vazhdimin e luftës kundër ISIS-it.
Ndërkohë, faza e dytë dhe e fundit e misionit të koalicionit ka nisur në Siri, me koordinim për eliminimin e objektivave të mbetura të ISIS-it dhe parandalimin e kërcënimeve ndaj sigurisë së Irakut.
Koalicioni do të përdorë një bazë ajrore në Irbil për mbështetje logjistike ndërkufitare, ndërsa forcat irakiane mund të kryejnë operacione të përbashkëta me SHBA-në nga Ain al-Asad kur të jetë e nevojshme.
Nuk pati reagime të menjëhershme nga Uashingtoni apo Damasku. Marrëveshja për planin dyfazor të përfundimit të misionit u shpall nga SHBA-të dhe Iraku më 27 shtator 2024.
Koalicioni i udhëhequr nga SHBA-ja, ku bëjnë pjesë edhe Franca dhe Spanja, u krijua në vitin 2014 për të luftuar ISIS-in, i cili në atë kohë kontrollonte zona të mëdha të Irakut dhe Sirisë.
