Inspektorati Qendror i Punës (IQP) ka ndaluar punën në 27 vendpunishte të sektorit të ndërtimtarisë gjatë 48 orëve të fundit.
Aksioni inspektues, i ndërmarrë me vendim të Ministrisë së Punës, është shtrirë në gjithë territorin e Kosovës, me fokus në ndërtimtari.
Sipas të dhënave të IQP-së, vetëm në Prishtinë janë mbyllur 9 vendpunishte, ndërsa 6 të tjera në Ferizaj dhe 4 në Prizren. Ndërkohë, kontrollet kanë përfshirë edhe komuna të tjera, ku janë evidentuar parregullsi të ndryshme.
Autoritetet bëjnë të ditur se të gjitha subjektet ndaj të cilave është shqiptuar masa e ndalimit të punimeve do të përballen me procedura gjyqësore për kundërvajtje, në përputhje me shkeljet e konstatuara gjatë inspektimeve.
“Në përfundim të aksionit, të gjitha kompanitë që kanë rezultuar me ndalim të punimeve procesohen automatikisht në gjykatë. Riinspektimet do të zhvillohen në ditët në vijim, sipas afateve të përcaktuara nga inspektorët, për të verifikuar nëse janë eliminuar parregullësitë”, thuhet në njoftimin e IQP-së.
