Është shënuar të premten 20-vjetori i themelimit të Inspektoratit Policor të Kosovës.
Nuk vonoi shumë, e përfaqësuesit e institucioneve shtetërore zunë vendet e tyre.
Bashkë u bënë në një ceremoni të organizuar në 20-vjetorin e themelimit të Inspektoratit Policor të Kosovës.
Fillimisht u shfaq një dokumentar mbi rrugëtimin e këtij institucioni ndër vite.
Më pas, fjalën e mori kryeshefi ekzekutiv, Kushtrim Hodaj.
“Sot, IPK gëzon besimin e qytetarëve. Rritja e vazhdueshme e numrit të ankesave të paraqitura nuk është vetëm tregues i problemeve, por është gjithashtu dëshmi se qytetarët besojnë se zëri i tyre dëgjohet”, tha Kushtrim Hodaj, kryeshef IPK-së.
E në anën tjetër, u.d. e presidentes, Albulena Haxhiu, punën e IPK-së e vlerësoi si më të vështirën në një shtet demokratik.
“Inspektorati Policor i Kosovës u ngrit me një mision që nuk është kurrë i lehtë, të kujdeset që ata të cilët e mbrojnë qytetarin të mbeten vetë brenda ligjit. Një nga detyrat më të vështira që një shtet demokratik mund ta ndërtojë vetë, pra brenda vetes”, deklaroi Haxhiu.
Disa fjalë i pati edhe kryeministri në detyrë, Albin Kurti.
“IPK ka dëshmuar se askush nuk është mbi ligjin dhe se besimi i qytetarëve ndërtohet me profesionalizëm, transparencë dhe llogaridhënie. Pikërisht gatishmëria e institucioneve të sigurisë për t’iu nënshtruar kontrollit të pavarur ka ndikuar drejtpërdrejt në rritjen e besimit të qytetarëve ndaj tyre”, vlerësoi Kurti.
Ndërkaq, ministri i Punëve të Brendshme, Xhelal Sfeqla, e cilësoi 20-vjetorin e IPK-së si moment reflektimi mbi rrugëtimin e deritashëm.
“Duke ecur krah për krah me Policinë e Kosovës, e kemi më të qartë se si duhet të funksionojë ky mekanizëm mbikëqyrës, i cili njëkohësisht mbron integritetin institucional dhe forcon besimin e qytetarëve. Themeli i përbashkët i këtyre dy institucioneve mbetet pikërisht besimi qytetar”, tha ai.
Në fund të ceremonisë, mirënjohje iu ndanë zyrtarëve të gjeneratës së parë të këtij institucioni.
