Inspektorati Policor i Kosovës ka rekomanduar suspendimin e një zyrtari policor të angazhuar në Njësinë e Komunikacionit Rrugor në kuadër të Drejtorisë Rajonale të Policisë në Prishtinë.
Sipas njoftimit, ndaj zyrtarit janë duke u zhvilluar hetime nën dyshimin për përfshirje në veprën penale “Ndihma në kryerjen e veprës penale”. Pas konsultimeve me prokurorin kompetent, rasti pritet të trajtohet në procedurë të rregullt.
Hetimet fillimisht janë iniciuar nga Policia e Kosovës, ndërsa më pas, pas dyshimeve për përfshirjen e një zyrtari policor, në rast janë përfshirë edhe hetuesit e IPK-së, në përputhje me kompetencat ligjore.
Autoritetet kanë bërë të ditur se hetimet po vazhdojnë dhe se do të ndërmerren veprime të tjera për të sqaruar plotësisht rrethanat e rastit.
