Inspektorati Policor i Kosovës ka rekomanduar Policisë së Kosovës suspendimin nga detyra të dy zyrtarëve policorë të Stacionit Policor Rahovec, të cilët bëjnë pjesë në Drejtorinë Rajonale të Policisë në Gjakovë.
Sipas të dhënave preliminare dhe provave të siguruara deri më tani, ekziston dyshimi i arsyeshëm se këta zyrtarë kanë kryer veprën penale të “Keqpërdorimit të pozitës apo autoritetit zyrtar”.
Hetimet lidhur me këtë rast po zhvillohen nga Departamenti i Hetimeve në IPK, në bashkëpunim me Prokurorinë e Shtetit, me qëllim të sqarimit të plotë të të gjitha rrethanave dhe veprimeve eventualisht të kundërligjshme të zyrtarëve policorë të përfshirë.
