Inspektorati Policor i Kosovës ka publikuar raportin e një inspektimi të jashtëzakonshëm që trajton përdorimin e teknologjisë për matjen e shpejtësisë së lëvizjes së mjeteve në trafik.
Ky inspektim është ndërmarrë me kërkesë të Kryeshefit Ekzekutiv të IPK-së dhe synon të vlerësojë mënyrën se si përdoren pajisjet digjitale për matjen e shpejtësisë dhe nëse ekziston rreziku i keqpërdorimit të tyre nga zyrtarët policorë gjatë ushtrimit të detyrës zyrtare.
Raporti vë në dukje dobësi të theksuara në pasqyrimin e të dhënave në gjoba në krahasim me shkeljet e regjistruara, duke ngritur shqetësime serioze për mundësi të abuzimeve.
Gjatë krahasimit të të dhënave nga radarët me ato të gjobave të shqiptuara, janë identifikuar katër lloje të mospërputhjeve në 84 raste të analizuara:
- Në 55 raste, shpejtësia e lëvizjes në gjobë ka qenë më e ulët se ajo e regjistruar në radar;
- Në 23 raste, kufizimi i shpejtësisë i regjistruar në radar nuk përputhej me atë në gjobë;
- Në 3 raste, lloji i shkeljes në gjobë nuk përkonte me atë të matur nga pajisja;
- Në 3 raste të tjera, është shqiptuar gjobë për tejkalim shpejtësie në bazë të nenit të papërshtatshëm të ligjit.
IPK ka ofruar shtatë rekomandime konkrete për përmirësimin e situatës, të cilat përfshijnë:
- Hartimin e një udhëzuesi për përdorimin korrekt të pajisjeve matëse;
- Trajnime shtesë për personelin;
- Ushtrim të kontrolleve për të eliminuar dobësitë në regjistrimin e të dhënave;
- Parandalimin e praktikave të gabueshme gjatë shqiptimit të gjobave;
- Përdorimin efektiv të automjeteve me teknologji inteligjente;
- Monitorimin e procesit të shkarkimit dhe ruajtjes së materialeve të regjistruara;
- Aplikimin e praktikës së printimit të kundërvajtjeve për të rritur transparencën.
Ky raport synon të nxisë rritjen e përgjegjësisë, transparencës dhe profesionalizmit në zbatimin e ligjit në fushën e sigurisë në trafik./teve1.info/
