Inspektorati Policor i Kosovës (IPK) ka nisur hetime preliminare ndaj dy zyrtarëve policorë të Drejtorisë Rajonale në Pejë – një nënkolonel dhe një kapiten – nën dyshimin për përfshirje në një rast të keqpërdorimit të pozitës apo autoritetit zyrtar.
Hetimet janë iniciuar sipas detyrës zyrtare, pas raportimeve në media për një incident të ndodhur më 28 maj 2025 në rrugën “Shpëtim Bojku” në Pejë. Në atë rast, disa zyrtarë policorë kishin shoqëruar në stacion një qytetar që nuk ishte i përfshirë në aksidentin në fjalë, por që dyshohet se kishte penguar zyrtarët gjatë kryerjes së detyrës.
Sipas njoftimit të IPK-së, dyshohet se nënkoloneli dhe kapiteni kanë ndërhyrë në mënyrë të parregullt duke ndaluar procedimin e mëtejmë të rastit, pa njoftuar Prokurorinë e Shtetit dhe duke e mbyllur rastin me një tiketë për kundërvajtje.
IPK ka bërë të ditur se, në konsultim me Prokurorinë, janë ndërmarrë veprime të para hetimore dhe është rekomanduar suspendimi i përkohshëm i dy zyrtarëve deri në sqarimin e plotë të rrethanave.
Hetimet vazhdojnë për të përcaktuar përgjegjësinë eventuale disiplinore dhe penale të të përfshirëve.
