Inspektorati Policor i Kosovës ka hapur një tender, përmes të cilit synon funksionalizimin dhe digjitalizimin e arkivit. Njohësit e çështjeve të sigurisë këtë hap po e quajnë të nevojshëm por të vonuar. Ndërsa kanë shtuar se me digjitalizimin e arkivit rritet edhe rreziku për rrjedhjen më të lehtë të informacioneve.
Institucioni që mbikëqyr punën e Policisë së Kosovës ka shpallur një tender për funksionalizimin dhe digjitalizimin e arkivit.
Ky hap, sipas ish-kryeshefit në këtë inspektorat, Valdet Hoxha, po shihet si shumë i nevojshëm.
“Për shkak se nuk është një organizatë shumë e madhe nuk është që ka qenë pengesë në efikasitetin dhe punën e saj por a është i nevojshëm digjitalizimi, pa dyshim që është një e arritur shumë e madhe, nëse arrin të digjitalizohet”, ka thënë Hoxha për Tëvë 1.
Por, Hoxha shton se me digjitalizimin e arkivit, shtohet edhe rreziku për rrjedhjen e informacioneve.
“IPK besoj që e ka parapa rrezikun e daljes së informacioneve jashtë, prandaj po e ceku që është më rëndësi kompania që do t’i besohet kjo punë, duhet të ketë kontratë shumë strikte, rigoroze”, thotë ai.
E si hap të vonuar digjitalizimin e arkivit në IPK, po e quan edhe eksperti i sigurisë në vend, Drizan Shala.
“Policia e Kosovës në këtë raport është shumë më e avancuar e ka të digjitalizuar sistemin e arkivave, edhe në aspektin klasik e ka të ruajtur, ndërsa IPK e ka shfrytëzuar më shumë emailat e zyrtarëve sesa që ka ekzistuar në hapësirë adekuate apo ndonjë sistem që ta mundëson qasjen pas disa viteve”, shprehet Shala.
Për çështjet që lidhen me këtë tender, Tëvë1 ka pyetur edhe në IPK. Por, deri në publikimin e lajmit nuk kanë kthyer përgjigje.
Kronika e realizuar nga gazetari Fidan Zejnullahu
