Një polic dhe katër qytetarë janë arrestuar mëngjesin e sotëm nga Inspektorati Policor i Kosovës.
Sipas njoftimit, ky aksion u zhvillua në pesë lokacione të ndryshme ndaj disa të dyshuarve për keqpërdorim të detyrës zyrtare dhe organizim të skemave piramidale si dhe bixhoz të kundërligjshëm.
“Sot që nga orët e hershme të mëngjesit, hetuesit e Inspektoratit Policor të Kosovës (IPK), të mbështetur nga njësi të reagimit të shpejtë të policisë kanë zbatuar një urdhëresë të Gjykatës Themelore në Prishtinë – Departamenti i Krimeve të Rënda, për kontroll dhe sekuestrim të dëshmive që do të gjenden gjatë kontrollit.
Operacioni zhvillua në pesë (5) lokacione të ndryshme ndaj disa të dyshuarve për keqpërdorim të detyrës zyrtare dhe organizim të skemave piramidale dhe bixhoz të kundërligjshëm. Gjatë kontrolleve të lokacioneve të ndryshme hetuesit e IPK-së kanë sekuestruar gjësende të ndryshme përfshirë: disa telefona mobil, dy USB, para të gatshme, dy pistoleta etj”, thuhet në njoftim.
Teksa të ndaluar si pjesë e këtij operacioni thuhet se janë pesë persona të dyshuar, prej tyre një zyrtar policorë dhe katër qytetarë.
“Veprat penale për të cilat dyshohen të ndaluarit janë: “Keqpërdorim i pozitës zyrtare apo autoritetit zyrtar”, “Armëmbajtje pa leje”, “Dhënie ndihmë kryesit të veprës penale pas kryerjes së veprës penale” dhe “Organizim të skemave piramidale dhe bixhoz të kundërligjshëm”.
Veprimet tjera hetimore do të ndërmerren në përputhje me autorizimet ligjore të IPK-së dhe në koordinim me prokurorin kompetent”, thuhet tutje./teve1.info.
