Ipeshkvi i Kosovës, Dodë Gjergji, ka deklaruar se në shoqëri nuk duhet të nxitet përçarja apo urrejtja në baza fetare, duke theksuar rëndësinë e dialogut dhe bashkëjetesës ndërfetare.
Ai i bëri këto deklarata në kuadër të tryezës “Bashkëjetesa ndërfetare ndër ne, virtyt hyjnor apo domosdoshmëri shoqërore”, e organizuar nga Fondacioni “Drita” dhe e mbështetur nga Bashkësia Islame e Kosovës (BIK).
“Unë nuk jam këtu për të vlerësuar, por duhet të vlerësoj në të vërtetë Fondacionin ‘Drita’ që e ka marrë këtë iniciativë dhe BIK-un që është mirëpritës për punën dhe organizimin, si dhe për mundësinë shumë të madhe që të rrimë së bashku, të diskutojmë dhe të dëgjojmë njëri-tjetrin. Ta gëzojmë një ditë së bashku, më bukur nuk ka ku shkon,” ka thënë Gjergji.
Ai shtoi se Kosova mund të shërbejë si shembull i bashkëjetesës ndërfetare për të tjerët.
“Ne jemi të vegjël për t’u bërë mësues të të tjerëve, por sigurisht të tjerët, duke na parë ne, mund të marrin një shembull shumë të bukur dhe një mënyrë se si fetë e ndryshme mund të jetojnë në paqe dhe dashuri me njëra-tjetrën, pa ndonjë rend të veçantë dhe pa u sforcuar,” u shpreh ai.
Gjergji theksoi se liria e besimit duhet të respektohet, por jo të keqpërdoret për nxitje të urrejtjes.
“Ne tani e gëzojmë lirinë dhe çdo individ ka të drejtë të përcaktohet aq sa e mbush shpirtin e tij dhe duhet t’ia njohim lirinë njëri-tjetrit, por nuk duhet ta përdorim këtë liri për të nxitur urrejtje dhe mllef ndaj atyre që mendojnë ndryshe apo që nuk janë të gatshëm të bëjnë zgjedhjen që e ka bërë dikush tjetër. Është e drejtë jonë të themi se ajo që po bëhet është gabim, por nuk duhet të nxisim përçarje,” tha ai.
