Një shtëpi bashkë me katër objekte përcjellëse në fshatin Strazhë të Novobërdës janë përfshirë nga zjarri. Pronarja e shtëpisë thotë se ka mbetur pa kulm mbi kokë për shkak se i është shkatërruar krejtësisht dhe se zjarri erdhi nga rryma elektrike. Derisa pas interesimit të televizionit, ekipet e KEDS-it shkuan pasdite për të bërë ndërrimin e shtyllave elektrike.
I gjithë investimi disa vjeçarë iu shkatërrua për një moment.
Një familjes nga fshati Strazhë e Novobërdës, iu përfshi nga flakët shtëpia e tyre.
Bashkë me to nga zjarri pësuan edhe katër objekte përcjellëse që gjenden në afërsi.
E gjithë kjo dyshohet se erdhi si pasojë e një defekti me shtyllat e vjetruara të energjisë elektrike.
Të paktën, kështu thotë pronarja e kësaj shtëpie e cila tregon se si ndodhi ngjarja.
“Kur kam dal jashtë është parë tym. Kam dalur të shikoj dhe kam parë që nga shtëpia ime digjej flaka. Bari është ndezur nga shtylla elektrike, problemi është rryma. Ne para gjashtë muajve, në shkurt, kemi thirrur KEK-un. KEK-u ka dalë në terren, kanë shikuar shtyllën elektrike, dhe ka thënë që nuk ka qasje të ndërrojë shtyllën elektrike. Kur frynë era, telat preken, siguresat e hedhin, dhe ka ardhur deri tek ndezja e shtyllës, barit, shtëpitë janë djegur, si dhe tri a katër “pleme”, nuk e di saktë. Shtëpia ime është djegur e tëra, me gjithçka që kemi pasur e disa shtëpi janë shuar, u shpreh pronarja e shtëpisë.
Ajo shprehet se nuk kanë marrë përgjigje nga askush dhe se tashmë kanë mbetur pa shtëpi.
“Policia ka ardhur pas dy orëve. Kemi thirrur zjarrfikësit, të cilët gjithashtu janë vonuar. Po të vinin zjarrfikëst në kohë, ndoshta diçka do të shpëtohej. Dy ‘pleme’ janë djegur deri kur erdhën zjarrfikësit, e edhe shtëpia, i tërë kulmi ishte djegur, nuk mundëm të shpëtonim asgjë. Shtëpia ishte e renovuar. Ka pasur tri dhoma, dhomën e ditës, banjën, të gjitha të rregulluara. Para një viti e kemi rinovuar tërë shtëpinë. Kaq. Tash kemi mbetur në dorën e Zotit. Falë Zotit, fëmija janë gjallë e shëndoshë”, ka thënë ajo.
Rastin e kanë konfirmuar edhe Policia e Kosovës ku është bërë e ditur se nuk ka persona të lënduar.
“Ankuesi mashkull kosovar, ka informuar se në rrethana të pa njohura nga zjarri është përfshirë shtëpia e tij, si dhe katër objekte përcjellëse të fqinjëve për rreth tyre. Zjarrfikësit kanë shuar zjarrin. Rasti është duke u hetuar”, thuhet nga policia.
E shenjat e zjarrit ishin prezente edhe të shtunën.
Aty u panë edhe shtyllat elektrike të cilat ishin tashmë jofunksionale.
Pas interesimit të televizionit, nga KEDS u bë e ditur se orët e pasdites tashmë ekipet e tyre janë në terren për të bërë ndërrimin e këtyre shtyllave.