Prokuroria Themelore në Prizren ka bërë të ditur se ka intervistuar 28 të dyshuar dhe 6 dëshmitarë të dyshuar për manipulim të votave në këtë komunë.
Kjo është bërë në aksionin e sotëm bashkë me Policinë e Kosovës pas zgjerimit të hetimeve lidhur me grupin e dytë.
Nga 28 të dyshuarit, pesë prej tyre janë ndaluar për 48 – orë.
“Pas autorizimit nga Prokuroria dhe në kuadër të zgjerimit të hetimeve, janë intervistuar njëzet e tetë (28) të dyshuar dhe gjashtë (6) dëshmitarë. Pesë (5) prej tyre pas intervistimit, me urdhër të Prokurorit të Shtetit, janë ndaluar për 48 orë. Katër (4) prej tyre, në cilësinë e kryesuesve të komisioneve, për shkak të dyshimit të bazuar se kanë kryer veprën penale “Falsifikimi i rezultateve të votimit” nga neni 216 të KPRK-së, si dhe një (1) person në cilësinë e Koordinatorit të KKZ-së për Komunën e Prizrenit, për shkak të dyshimit të bazuar se i njëjti ka kryer veprën penale “Keqpërdorimi i pozitës apo autoritetit zyrtar” nga neni 414 të KPRK-së”, thuhet nga Prokuroria.
Prokuroria Themelore në Prizren, brenda afateve ligjore, do të vlerësojë parashtrimin e kërkesës lidhur me caktimin e masës për sigurimin e prezencës së të pandehurve në procedurë.
Javën e kaluar Prokuroria në Prizren bashkë me Policinë e Kosovës ka arrestuar 109 persona për manipulim të votave, ndërsa ndaj 23 prej tyre është caktuar masa e paraburgimit me nga 1 muaj.
Arrestime ka pasur edhe në Malishevë. 15 persona të dyshuar për manipulim të votave në këtë komunë, janë paraburgosur./teve1.info/
Prokuroria në Prizren vazhdon hetimet ndaj grupit të dytë të të dyshuarve për manipulimin e votave
