Interi ka nisur kërkimin për një zëvendësues të mundshëm të Hakan Calhanoglu, pasi e ardhmja e mesfushorit turk duket gjithnjë e më larg Milanos.
Lajmi është raportuar nga gazeta prestigjioze italiane Corriere dello Sport.
Skuadra zikaltër është e gatshme të dëgjojë oferta për 31-vjeçarin dhe kërkon një shumë që varion mes 30 dhe 35 milionë eurosh për kartonin e tij.
Galatasaray ka shfaqur interes konkret për Calhanoglun dhe ka nisur kontaktet e para me Interin për një marrëveshje të mundshme gjatë kësaj vere.
Nëse ndodh largimi i Calhanoglus, drejtuesit e Interit kanë identifikuar si objektiv mesfushorin kolumbian Richard Rios, që aktivizohet te Palmeiras.
Rios ka tërhequr vëmendjen e skautëve zikaltër pas paraqitjeve mbresëlënëse që dha në Kupën e Botës për Klube 2025.
Mesfushori 24-vjeçar është i hapur për një aventurë në Evropë dhe Palmeiras mund të jetë i gatshëm ta shesë nëse mbërrin oferta e duhur.
Megjithatë, Interi do të përballet me konkurrencë nga disa klube të tjera evropiane që gjithashtu janë në garë për nënshkrimin e Rios.
