Interi ka dominuar dhe e ka fituar trofeun e Superkupës së Italisë 2022 për herën e dytë rresht. “Nerazzurrët” të mërkurën mbrëma mposhtën Milanin me rezultatin 3:0, me dy gola të shënuar në pjesën e parë, dhe një në pjesën e dytë të ndeshjes.
Ky ballafaqim u zhvillua në Riad të Arabisë Saudite, në stadiumin “King Fahd International”. Golat e pjesës së parë u shënuan nga Federico Dimarco në minutën e 10-të kur u asistua nga Nicolo Barella, dhe Edin Xheko në minutën e 21-të, pasi bashkëveproi me Alessandro Bastonin.
Në pjesën e dytë shënoi edhe Lautaro Martinez, fituesi i Botërorit me Argjentinën, në minutën e 77-të. Kristjan Asllani luajti për Interin nga minuta e 84-t. Me këtë triumf, Interi barazohet me “rossonerët” sa u përket trofeve të Superkupës së Italisë, me nga shtatë gjithsej. Interi edhe në edicionin e fundit kishte dalë fitues në takimin ku përballet fituesi i Kupës dhe i ligës italiane.
Ky ishte “Derby della Madonnina” numër 234. Interi tani ka 86 fitore, ndërsa Milani mbetet me 79 fitore gjithsej. Pas tre javësh, këto dy skuadra do të takohen sërish në derbin e Milanos, por në Serie A, më 5 shkurt. Milani dhe Interi në Superkupën e Italisë ishin takuar vetëm një herë më parë, në gusht të vitit 2011. Atë finale e kishte fituar Milani 2:1, kur drejtohej nga trajneri Massimiliano Allegri.
