Ka 16 muaj është duke u mbrojtur nga policia zvicerane në shtëpinë e tij.
Edhe kur del jashtë shtëpisë është i detyruar të mbaj jelek antiplumb, ndërkaq makina e tij është e blinduar dhe e shoqëruar me mjete policie.
Bëhet fjalë për ish-raportuesin në Këshillin e Evropës, Dick Marty.
Emër ky i njohur për publikun kosovar.
Ai thotë, se është i kërcënuar me vdekje nga elementë radikalë të shërbimit të inteligjencës serbe dhe sipas tij vrasësit më pas do t’i fajësonin kosovarët për këtë krim .
“Kërcënimi me sa duket vjen nga qarqe të caktuara të shërbimeve të inteligjencës serbe, të cilët i kërkuan botës së krimit, vrasësve profesionistë, të më likuidojnë thjesht për t’ua vënë fajin kosovarëve”, thotë Marty.
E kjo ngjarje ndriçon manipulimin që iu është bërë Dick Marty-t nga strukturat serbe dhe ruse, thotë hulumtuesi nga universiteti Agder, Abit Hoxha.
Ndërkaq sipas Profesorit Seb Bytyçi, metoda të ngjashme Serbia ka përdorur edhe më herët, me qëllimin për ta dëmtuar imazhin e Kosovës.
Kujtojmë që Dick Marty, e shkroi një raport në të cilin ai pretendonte se disa pjesëtarë të Ushtrisë Çlirimtare të Kosovës kishin kryer krime gjatë dhe pas luftës në Kosovë.
Në bazë të këtij raporti më pas u formua Gjykata Speciale, ku po gjykohen ish krerët e Ushtrisë Çlirimtare të Kosovës.
Kronika e realizuar nga Shpat Blakqori
