Organizata që mbikëqyr Çmimin Nobel për Paqen ka hedhur poshtë pretendimet se udhëheqësja e opozitës venezueliane, Maria Corina Machado, do t’ia japë çmimin e saj të fundit Presidentit Donald Trump.
Pasi Çmimi Nobel për Paqen të shpallet, ai nuk mund të revokohet, transferohet ose ndahet me të tjerët, tha Instituti Norvegjez i Nobelit në një deklaratë të shkurtër të premten.
“Vendimi është përfundimtar dhe i vlefshëm përgjithmonë”, tha ai, transmeton AP.
Deklarata vjen pasi Machado tha se do të donte ta jepte ose ta ndante çmimin me Trump, i cili mbikëqyri operacionin ushtarak të SHBA-së, ku u rrëmbye presidenti i Venezuelës, Nicolas Maduro, i cili po përballet me akuza për krime në lidhje me drogën në Nju Jork.
“Do të doja shumë t’i thoja personalisht se ne besojmë – populli venezuelian, sepse ky është një çmim i popullit venezuelian – me siguri duam t’ia japim dhe ta ndajmë me të”, tha Machado për Fox News të hënën.
Machado ia dedikoi çmimin Trumpit, së bashku me popullin e Venezuelës, menjëherë pasi u njoftua.
Trump e ka lakmuar dhe ka bërë fushatë të hapur për të fituar vetë Çmimin Nobel që kur është rikthyer në detyrë.
