Inspektorati Qendror i Punës ka ndaluar punimet në 16 vendpunishte në Pejë, Prishtinë, Ferizaj, Lipjan dhe Fushë Kosovë, pas inspektimeve të zhvilluara në kuadër të mbikëqyrjes së zbatimit të legjislacionit të punës dhe sigurisë e shëndetit në punë.
Sipas njoftimit të Inspektoratit, gjatë kontrolleve janë konstatuar shkelje të rënda të dispozitave ligjore, të cilat paraqisnin rrezik serioz për jetën dhe shëndetin e punëtorëve.
“Për këtë arsye, Inspektorati Qendror i Punës ka urdhëruar ndalimin e menjëhershëm të punimeve në 16 vendpunishte, deri në eliminimin e të gjitha parregullsive të evidentuara dhe krijimin e kushteve të sigurta për punë”, thuhet në njoftim.
Tutje bëhet e ditur se këto masa kanë për qëllim parandalimin e aksidenteve në vendin e punës dhe garantimin e sigurisë së punëtorëve.
“Rifillimi i punimeve do të lejohet vetëm pasi inspektorët të konstatojnë se janë përmbushur të gjitha kërkesat ligjore dhe standardet e sigurisë”, thekson Inspektorati.
Institucioni ka paralajmëruar se kontrollet intensive do të vazhdojnë në të gjithë territorin e Kosovës dhe ka bërë të ditur se nuk do të tolerojë asnjë shkelje që rrezikon jetën dhe shëndetin e punëtorëve.
